勇氣

轉左黎blogspot呢度正式post既第一篇entry…繼續我手寫我心，有咩講咩。始終，我認為網誌係記聚當下心情，多過下下出精品！老實講，我既工作，絕大部份已經同文字／筆耕有關；寫blog都係還原基本步，簡單就是美好d！

搬左地盤確有唔慣。唔就手係必然既：邊度回覆番大家既回應？邊度可以一次過睇番自己登既entries？點樣可以“裝修”下個地盤呢？有冇時間制功能呢？全部唔識！

等同搬左新屋，樣樣野唔就手；甚至連訓都會冧一樣…

一切都係習慣。

我地既人生何嘗唔係不斷要轉變、不斷要習慣呢？

周之無日不停需要面對轉變。人，天生就係有惰性。好多時，我地最驚既就係轉變。大事唔好講，細眉細眼既野我地都成日船頭驚鬼，船尾驚賊；諸多顧慮，綁手綁腳。於是，搬新屋如是，番新工如是，面對新敢情如是…

由細到大，呢d處境發生得太多；但偏偏我地就冇習慣過轉變，反而習慣左固有既習慣。

我咁講，並唔係我叻過人；更加唔係我一d都唔怕轉變。只係，我認為如果連轉變既勇氣都拎唔出，做人、做事都永遠好難成功！一次生、兩次熟。識得咁諗，再比d耐性去適應新既事物、新既環境，自己慢慢摸，點都總好過固步自封，原地踏步，一池死水仍然繼續丫？！

千里之行，始於足下。

行出一步，轉變，其實並唔係世界末日！他日望番轉頭，好多以前認為好嚴重既野，原來都只係一笑置之唧！